【ATV告急之輪住爆料】王征入主亞視後，搞到翻天覆地，最近的桃色新聞，更令人咋舌。先有「用完即棄」梁景煌（Tommy）爆大鑊，昨日有報道指人夫姜皓文都是受害者，最終被迫離開亞視。原來高大威猛的袁文傑，在離開亞視3年之前，早已被即將進駐亞視的王征睇中，王征安排袁文傑到上海陪睇昆曲，之後又約會袁文傑單獨見面食飯，更即場傳短訊約文傑「上去飲嘢」，王征十分主動，嚇得袁文傑慌忙逃脫。
握到唔願放手
袁文傑先提到人夫姜皓文在2012年北京台慶騷中招，他昨在電話中大笑說：「我嗰次有去，上下其手我睇唔到，可能人太多，哈哈哈！」然後憶述發生在自己身上的經歷，他說：「我諗我係成個亞洲電視藝員，係第一批觸王征先生，因為有一年唔知佢係咪睇完我哋亞姐之後，突然公司叫我上上海睇一個昆曲藝術表演，我係莫明其妙，睇完之後，當時查生（亞視股東查懋聲）都喺度，介紹咗王征先生認識，然後一齊食飯，記得握手嗰時佢係好似有啲唔願放手咁，另外喺我返到房，就見到酒店房間地下有張紙，原來係佢（王征）嘅電話號碼，佢要攞我電話號碼唔難，但係……其實畀張咭片我咪得囉！」
王征之後來港再邀約袁文傑單獨見面，不過文傑帶同另一位同事出席飯局，他說：「跟住之後返到香港冇幾耐，佢又再約我食飯，佢淨係叫我去，但係我叫埋藝員部同事去，我當係高層活動，嗰餐飯都有啲得意嘢，我哋同枱食飯，突然間手機有個訊息傳過嚟，原來係佢（王征），問我：『食完飯可唔可以一齊上去飲嘢？』，我冇應約，睇完個訊息之後，我望一望佢，佢又好得意咁望一望我，係好得意嘅眼神嚟㗎！跟住咪當冇嘢繼續食飯。」
大家庭精神不再
袁文傑直認當年傾續約獲加薪，仍堅決離開，是不想違背自己良心，他說：「當年每個人傾約減，係我加，但係我都選擇走，因為裏面整體氣氛有啲怪，亞視大家庭個精神已經唔同，呢個係我唔願意見到。」
採訪：楊潔雯
