又有內房出事，今次輪到花樣年（1777）同恒盛（845），綜合投資界嘅意見，兩間公司出事嘅驚嚇程度遠不及佳兆業（1638），何解？「你都預咗㗎啦！」個答案咁鬼未卜先知，筆者梗係追問佢哋有乜蛛絲馬迹睇得到啦。
就花樣年嘅個案，綜合答案如下：花樣年本身都無乜資產，無端端拆隻彩生活（1778）出嚟，單係呢樣就要睇緊啲，仲有花樣年一出嚟賣點係乜？曾慶紅個姪女曾寶寶，炒大陸民企，高增長當然好玩啦，好起上嚟大茶飯，但眾所周知，佢哋有一樣致命性風險，就係政策或政治性風險（如果可以的話，真係想用紅字），即係唔知衰乜，呢家嘢真係會輸身家，曾慶紅傳涉周永康案就應該留意。
至於恒盛，呢隻嘢除咗上市果時好過下之外，咁耐都未好過，主席仲可以得閒無事去炒下美股，仲俾人周佢內幕交易，咁樣嘅公司，唔傳佢涉令計劃案，齋傳佢乜嘢不利消息都有人信，都唔使傳到走佬咁嚴重，有基金朋友仲話「之後咁多單野都唔沽佢嘅，唯一誘因只會係個投資者唔記得自已揸住。」所以仲揸住嘅，「梗係趁再有消息出嚟沽得就沽，佢係唔係無辜都好啦，我志在甩手！」
流氓