患有罕見視網膜母細胞瘤（Retinoblastoma）嘅兩歲半男童邵知言（Henry），上月喺父母陪同下，到美國接受斑塊放療（Plaque radiotherapy）治療，估計醫療費連生活費達百萬元。為咗援助知言一家開支，知言媽媽黎明任職嘅香港管弦樂團噚晚喺尖沙嘴文化中心舉行慈善音樂會，為知言籌得約百萬元。
統籌籌款音樂會嘅劉元生慈善基金會主席劉元生話，知言要接受十八次放療，已完成十五次，未來三日要完成埋餘下三次，之後觀察四至六星期先知療程係咪有效。所以希望籌到更多善款幫助佢哋一家人。噚晚音樂會反應熱烈，派出咗約二千張門票。港樂音樂總監梵志登（Jaap van Zweden）擔當指揮，演奏柴可夫斯基《弦樂小夜曲》等曲目。