前日特首梁振英喺立法會宣讀施政報告期間，新界王鄉議局主席劉皇發疑似為免「政治不正確」，急急喺梁振英進場前除咗條黃呔，點知說時遲那時快，梁振英啱啱喺佢身邊行過，攞住黃呔嘅發叔有啲尷尬。噚日梁振英再到立法會出席答問大會，發叔終於跟番建制大隊，打番條淺藍色呔任影唔嬲，仲指住條呔同其他議員、仲有政制及內地事務局局長譚志源等等傾得好投契。
「顏色唔係任何人專利」
而喺發叔從藍之時，盛傳同梁振英唔多啱key嘅財政司司長曾俊華，卻打咗條黃藍雙色呔現身，仲要係黃多藍少，令唔少議員行注目禮，唔通佢藉此向方丈挑機？八方問過財政司司長辦公室，財爺打上黃藍呔，係咪別有用心？發言人話喎，任何顏色唔應該係任何人嘅專利。據聞財爺噚日朝早係冇分「色」隨心揀呔喎。