太古地產（1972）舊年搞咗一個blueprint項目，將太古坊康和大廈其中兩層、合共兩萬平方呎樓面改頭換面，畀創業公司租用。呢個辦公室上月啟用，太地新任行政總裁白德利噚日主持開幕儀式，順便畀大家參觀。
呢個辦公室以公共空間形式設計，望落幾似facebook同Google嘅寫字樓，裏面嘅房間或枱凳，任何人都可以隨意使用，方便大家交流。最特別係，太地「善用」集團內其他企業嘅東西做擺設，好似國泰（293）飛機椅、餐車，好有太古特色。
辦公室其中一層免租半年，畀十一間被揀中嘅B2B公司創業。另一層就租畀任何想創業嘅人使用，最多可容納二百八十人，每人每月以人頭計算交租，一至兩人嘅公司，每月每人交二千蚊，三人或以上嘅團隊就每月每人交租一千蚊。
白德利話，可能喺旗下其他地方搞類似項目，視乎孖屐反應而定。
