86歲嘅「四叔」李兆基算係傳媒甜心，每次面對傳媒提問，多數有問必答，噚日佢仲向在場每名記者送上一罌日本馬油，實行將自己用開嘅好嘢，公諸同好，認真窩心。馬油係日本人至愛護膚品之一，除保濕美容效果好，對濕疹或皮膚燙傷都有舒緩功效。
四叔用咗呢款日本北海道馬油好多年，每年都大量訂購，每罌約兩百蚊，佢自己用之餘，又會送畀親戚朋友，咁啱噚日見到傳媒就同大家分享。估唔到四叔除咗識做生意同埋投資，護膚都有一手，唔會dry。
佢又話，𠵱家已經「退退哋（休）」，上晝已經冇返工，將會慢慢嚟，慢慢減工作量咁話。對於超人李嘉誠最近將長實（001）、和黃（013）重組，四叔認為「重組係點醒啲人公司唔值咁少」，如果每間地產公司逐單逐單拎出來計，再重組上市，公司價值會升兩成至三成，但恒基系無意重組。
他堅持，由於地產股較資產有折讓，買地產股好過買樓。A股佢就唔識睇了。