有時阿仙奴啲球星走人，其實係咪怕咗阿仙奴啲傷病紀錄。例如拿斯尼喺阿仙奴(圖)嗰陣，場均每季傷4.7次，轉去曼城度好咗，微跌至4.5次。阿仙奴著名叛徒艾殊利高爾，二○○二至二○○六年喺阿仙奴期間，平均每季傷4.3次，但去咗車路士後跌到3.6次。唔通離開阿仙奴真係會健康咗？
香港好多球迷都係睇吓趣聞就算，但小弟就鍾意分析足球數據，例如前排見到位內地網民統計咗阿仙奴近十三季嘅傷兵情況，覺得幾有意思，值得細味。阿仙奴呢十三季就厲害囉，從來冇跌出過英超最多傷兵榜嘅前三名。
由二○○二年夏天到過去周末，阿仙奴有球員受傷九百二十六次，係有統計以嚟傷兵最多嘅英超球隊。排第二位嘅係曼聯，有八百二十七次，已經少阿仙奴成百次！逐季嚟睇，喺二○○三至二○○八呢幾季，傷兵數字都喺六十次左右。不過，講到阿仙奴幾時喺傷兵方面拋離群雄，就係二○○八年之後嘅事。
二○○八至二○○九球季，傷兵突然急升至七十四次，之後嗰季再升上八十七次。究竟喺二○○八年夏天發生咗咩事呢？嗰一季，有個人離開咗阿仙奴，佢係隊醫主管加利利雲，之後就由佢姪仔哥連利雲接手。喺哥連利雲嘅上任後，阿仙奴每季傷兵數字就未跌過落六十次以下，上季仲創新高一百一十一次！小弟唔敢妄下結論，只係想分享呢個發現。
文：咖喱