潮流興復出？前排印度搞印超聯，好多退役球星好似龍格保、皮利斯、尼斯達等都回歸球壇，唔知係咪見到啲同輩球星踢得咁開心，搞到「肥哨」朗拿度都心癢癢，近期就入主北美足球聯賽球會勞德代爾堡前鋒（Fort Lauderdale）做小股東，計劃重出江湖。
望四月開季前達標
朗拿度據報擁有勞德代爾堡前鋒10%嘅股份，而佢喺宣佈成為股東之一嘅記者會上，就透露自己可能會落場踢埋：「要復出真係唔簡單，但我真係好鍾意足球，呢項運動係我生命好重要嘅一部份。其實當年就因為太多傷痛，先選擇早啲退休。」肥哨今年三十八歲，其實唔算太老，四十一歲嘅傑斯喺英超都踢到上季先退休，喺呢啲競爭唔大嘅聯賽踢衞生波，要東山再起實冇問題，但你同我同佢自己都知，最大問題係佢嘅體重，退休後已經肥到豬頭咁款，跑幾步都慢過人，如果唔減吓肚減吓磅，又點踢番波？
肥哨就決心喺四月開季前盡力減肥：「要踢好波就要先keep到一個好嘅身形，呢樣嘢對我嚟講係另一個挑戰。如果教練需要我，我就會不停訓練去操弗體能。」不過，我求大俠都係聽住先，肥哨生活咁多姿多采，佢會唔會喺呢幾個月成功減磅，我真係好懷疑，但就算唔得，肥哨到時咪可以學吓賀歲片《12金鴨》入面影宣傳照嘅吳君如咁，裝住假狗扮大隻，可能可以瞞天過海呢！
肥哨復出已經夠晒噱頭，但另一樣仲吸引嘅，就係細佢一歲嘅皇馬舊隊友魯爾，早前亦加入咗同樣係北美足球聯賽嘅紐約宇宙隊做球員兼青年軍技術顧問，即係話佢哋兩個有可能喺比賽入面重逢，到時肯定雞啄唔斷，可能仲會吸引唔少球迷入場，欣賞吓兩大球星嘅風範。
識睇，一定係睇足英台【英波Live】：
http://soccer.appledaily.com
http://bit.ly/engballlive