向港大學生刊物《學苑》發炮後，特首梁振英似乎未夠喉，噚日出席立法會出席答問大會時繼續戰鬥格，全程同泛民議員鬥嘴。工黨主席李卓人發言時斥梁振英喺施政報告點名批評《學苑》，係想做香港毛澤東，大搞文革同批鬥，梁振英不單答非所問，仲反唇相稽話阿人唔支持政改方案，先係「普選殺手」，激到阿人走出座位以示不滿，但佢此舉卻令立法會保安大為緊張兼攔截，阿人唔想同保安衝突，改為同隔籬嘅公民黨梁家傑握手，之後轉身離開，此時立法會主席曾鈺成亦逐佢出會議廳。
唔知阿人係聽唔到定博大霧，過咗陣佢又返入去坐；曾鈺成原本冇為意，點知阿人喺另一議員發言時提規程問題，曾主席即時話：「我剛才命令你離開會議廳。」但講完呢句夠鐘完會，阿人終於坐到散會。