NBA係英雄地，不過越嚟越多女性參與，而女球證亦越嚟越多。索女蘿倫（Lauren Holtkamp）今季起成為第3位全職女球證，不過周二執法帝王主場對小馬嘅常規賽，第4節尾段就疑似冤枉帝王中鋒吉辛斯（DeMarcus Cousins）犯規，搞到吉辛斯6犯離場，小馬亦都乘機加時以108:104險勝。
33歲嘅蘿倫由04年起已經投身球證界，慢慢由大學、D-League，提升到NBA球證，今季更獲NBA聘為全職球證，並辭去駐醫院嘅牧師工作；雖然佢唔算係驚艷型，不過有一對酒窩，加上紮起馬尾，笑起上嚟都幾有鄰家女孩Feel。
吉辛斯冤枉6犯離場
靚女還靚女，做球證始終要公正嚴明行先，呢場波佢就真係走漏；第4節最後21.7秒，當時兩隊99:99，帝王就有控球權進攻，中鋒吉辛斯同小馬中鋒真達拿（Tyson Chandler）爭位，真達拿疑似被批踭，蘿倫就判吉辛斯進攻犯規，呢位貢獻32分16個籃板嘅中鋒無奈離場，不過從慢鏡所見，吉辛斯冇批中真達拿，只不過係真達拿扮嘢。帝王大將被逐，加時階段失去重心，小馬就憑艾利斯攻入28分，以4分險勝主隊。
心水清嘅球迷就搵番舊相，蘿倫喺13年12月主吹帝王對山貓（現稱黃蜂），就疑似俾當時效力帝王嘅I湯馬士（Isaiah Thomas）胸襲，不過I湯馬士已經轉投太陽，如果蘿倫想報仇，應該搵太陽先係㗎。
識睇，一定係睇足英台【英波Live】：
http://soccer.appledaily.com
http://bit.ly/engballlive