跑馬開翻版Q唔係大新聞，不過派彩係上次十倍有多，都算經典。呢晚第三場四班千二米一對外檔馬11檔「無敵城堡」同10檔「天地福星」跑入頭兩名，連贏派1,405.5元，上仗「天地福星」由雷神熱門贏，「無敵城堡」都係熱門之一輸少少跑第二，當時呢條內檔馬Q只派122元，當晚「無敵城堡」還抗議「天地福星」的頭馬資格，結果不成立，「無敵城堡」今次終於報了一箭之仇。
今場「天地福星」雷神唔騎換薛寶力，變咗48倍大冷，但就追唔切，畀14倍冷門「無敵城堡」以短距離之先由韋達一手一腳反勝補中，五歲馬第14次在港出賽終於開糊，跑第三係綠燈馬「蜜圈」，同場其餘三匹落飛馬「紀利福星」、「仁愛之友」同「紅運飛駒」全部冇影，輸死落飛黨咁滯；大熱門「大勇士」更加冇段好睇，2檔起步飛出外叠轉彎，成條直路冇望空過落第。
「無敵城堡」馬主鄧俊賢說十分開心，可以成功補中，由於今仗排檔不好，所以要靠韋達出色的發揮。他除了感謝徐雨石外，還多謝馬會，讓他和好朋友方力民一起中籖，可以合夥養馬，交流養馬樂趣。方力民則指這場頭馬徐雨石居功至偉，馬兒健康曾出現挫折，兩度賽後氣管有大量血液，徐雨石小心打理，經常在晨課親自操練，花了許多心機，因此他和老友鄧俊賢都好感謝石哥。