人稱「球伯」嘅本地製衣業元老陳瑞球似係開始正式退下來了。YGM貿易（375）噚日宣佈，89歲嘅球伯由於年紀關係，即日起辭任榮譽主席同埋執董職位。
球伯來自紡織業世家，1949年創辦長江製衣廠，當年佢得23歲，初時生意規模好細，員工唔過百，其後發展越來越大，就上市變為長江製衣（294）。
長江製衣1988年將YGM貿易分拆上市，佢位千金陳淑玲一路打理呢間公司，球伯亦喺2010年由主席轉為榮譽主席。不過今次球伯只係辭任YGM貿易嘅職務，仲係長江製衣主席。
查實股民𠵱家都好少人炒紡織股，關於YGM貿易，最特別係佢喺2012年買入當時陷入財困嘅英國百年時裝老品牌Aquascutum。球伯嘅姪仔就係全國政協常委陳永棋。