52歲的杜德偉（Alex），2012年迎娶28歲的嬌妻李曉冰（Ice），婚後由台灣回流香港。去年底開唱，台上一條三角底褲大騷爆肌，贏得美魔男之名。兩公婆年齡相差超過24載，但完全零隔膜，杜德偉直認自己是幸福人夫，訪問時不停強調「我真係好幸福」，葡萄友對杜德偉羨慕又妒忌，羨慕他人到50仍娶得嬌妻，妒忌他這麼多年身形和樣貌還keep得好，幸福美魔男是如何煉成的？
撰文：顏英儀
造型：鄧卓嶽
攝影：郭賢興
化妝：Hetty Kwong
髮型：Ted Yeung of ii Hair Salon
杜德偉是85年第4屆新秀歌唱大賽冠軍，30年經歷過事業的起起跌跌，早年去了台灣發展唱歌兼做時裝設計生意，兜兜轉轉，這兩年又重返香港樂壇。上年8月，重踏闊別20年紅館舞台開騷，52歲於台上穿上閃爆銀色三角底褲大騷爆肌，身形fit爆。今年3月再添食加開兩場，「上年係我人生轉捩點，百分百回歸音樂世界，我發現有更多美好嘅事，未來希望更加專注音樂，演唱會Part 2會保留最精采嘅部份，亦會有新鮮感畀觀眾。」
事業愛情兩得意
回流返香港的一大原因，和2012年迎娶28歲的李曉冰（Ice）當然有關。兩人年齡相差超過二十年，但絕非外界預期的老公照顧老婆，相反，早年先後失去了雙親的Alex，受來自大家庭太太影響，慢慢愛上熱鬧大家庭生活。
「結婚後多咗一份幸福嘅責任，我仲有一顆赤子之心，好享受𠵱家呢個階段，我又唔貪玩，除咗工作所有時間都放喺家庭，好多人覺得工作同家庭唔可以同時擁有，但我覺得工作同家庭係一個平衡，所以，無話可說，我覺得自己好幸福！」Ice也因搖滾老公，戀上紋身，也全職做跟得老婆，貼身照顧打點兼支持，拍攝當日Ice亦有在場。「有時仲覺得太太仲係我女朋友，我唔知我係唔係一個浪漫嘅人，平日都會𠱁吓老婆開心。」
外父外母恨抱孫
下月便踏入53歲，杜德偉亦心急做爸爸，不過造人大計卻因工作要一再押後，「外父外母都好期待抱孫，佢哋鍾意大家庭，既然遲早都要生，不如趁早生，但咁啱有好多工作彈出嚟，本來上年聖誕準備造人想生羊B，不過咁啱紅館抽到檔期做演唱會Part 2，可能係上天嘅啟示，叫我哋完成想做嘅事先至迎接小朋友。」
事實上，不少網民對杜德偉的歲數大感驚訝，更有年輕網友以為他只得3字頭，防腐工夫做到足的杜德偉，外表跟80後的太太襯到絕。要做凍齡美魔男，並不是一朝一夕的事，他透露早在20幾歲已開始保養，30年無間斷操練，才有今日的成果，「其實最重要係了解自己身體，去到我呢個階段，唔繼續操練，身體機能就會直線下降。演唱會最大得着係畀到我好大嘅運動量，每日排舞至少4個鐘，一個星期3日core training（核心訓練），平時飲食要節制，少煎炸濃味食物，最緊要有足夠睡眠。」
30年前跌落窿
85年杜德偉由加拿大返港，參加新秀歌唱大賽入行，入行30年，難忘事數之不盡，真正要數不能忘懷的，原來是一個洞，他說：「最難忘應該係出道兩年，有機會擔任梅艷芳世界巡迴演唱嘅表演嘉賓，當時對一個新人嚟講，係一個好難得嘅經驗。可惜喺紅館表演時，第一句歌都未唱，就已經唔小心跌咗落個窿度，對腳仲流晒血，𠵱家仲有道疤痕，由嗰日開始我同自己講我唔可以跌落任何一個窿度。」其實，演唱會跌入窿的怎會只有杜德偉？林子祥都跌過呀。
【買衫精最愛Saint Laurent】
愛音樂的杜德偉亦愛時裝，美魔男除了重視keep fit和護膚外，買衫亦從不手軟，早前與太太Ice歐遊，花了百萬元掃新裝，Ice就即場踢爆大部份都是Alex的戰利品，Alex即說：「做我哋呢一行，貪靚係專業嘅美德。」身在娛樂圈攞正牌買衫扮靚，Alex自言早年最愛Jean Paul Gaultier，近年則愛上Saint Laurent，皆因喜歡設計師Hedi Slimane將搖滾精神融合時裝，他說：「平日出街小則花十分鐘，最耐要個半鐘先出得街，有時候出街後覺得唔襯，會再返屋企換衫，最buy係時裝設計師將音樂融合設計之內，襯衫好睇心情，有時，連底褲都要襯埋。」
更多精采時尚內容，盡在 http://add.appledaily.com。