梁振英份施政報告亮點，竟然落喺亞視炮製嘅「鼓勵幼稚園提供全日性服務」身上，加埋五歲小朋友重覆出現。真係好想問呢個小朋友係讀乜幼稚園，以致佢早熟到咁？
話說噚日嘗試喺施政報告搵概念股，進智（077）、本地建築股都炒上。眾多議題入面，其中一項係比較詭異。報告話，考慮預留空間發展電影院，並研究如何在土地出售及規劃上配合電影院的發展。話說香港幾乎每一個商場都有戲院，就算冇政府嘅推動，都大把人肯畀錢去起，因此，由市場主導已經夠，咁梁特點解大費周章話要去起戲院呢？
呢頭先話小朋友驚冇地方住，嗰頭又話起戲院，成件事好唔合邏輯。就算真係要建戲院，何解政府突然重視土地規劃嘅層面？除非佢想鋪路開電影城，搞到好似萬達電影城咁大規模。
至於個電影發展基金，據電影發展基金網頁，去年成功獲批融資電影得一部咁大把，是黃百鳴監製的「我們停戰吧！」，融資一百九十五萬港元。證明要拎呢個基金，門檻應該唔細。
而家突然話推動電影業，係真心定係有其他蠱惑嘢？真係要放長雙眼。所以你見噚日啲橙天嘉禾（1132）、天馬（1326）呢啲都冇乜反應，其實好合理。再講，假設真係玩到咁大，將電影城以獨立地產項目發展，第一個中標嘅應該未到上咗市嘅本土院線，點都係啲中港大財團先。
Fifi
http://www.facebook.com/lovefrystock
本欄逢周二、四刊出