股神畢菲特兩位愛徒庫姆斯同埋韋施勒，自從三、四年前加入巴郡做投資經理，表現青出於藍。股神曾經曲線讚兩位，話佢哋表現好過自己咁多，如果繼續輸畀佢哋，就惟有唔再提，以免自己咁瘀。
庫姆斯同韋施勒家陣管理資產佔巴郡整體資產逾一成，被傳係股神接班人大熱。不過唔知係咪讚壞咗，《財富》幫兩位計數，發現2014年庫姆斯嘅投資組合回報縮水0.3%，韋施勒亦只賺6.7%，跑輸標普500指數11.4%回報。
庫姆斯嘅投資組合入面，最大佔比係芝加哥橋樑鋼鐵，但呢隻股份舊年股價跌一半。至於韋施勒就係俾舊年大量回收產品嘅通用汽車拖累，通汽舊年跌15%。
雖然巴郡未公佈業績，但根據巴郡過去十年股價表現，當中有七年都跑贏標指，睇嚟今次股神唔會輸嘞。