若然要討年輕人嘅歡心，少啲創意都唔多掂。好似要幫梁振英搞個3億元青年發展基金、協助年輕人創業嘅民政事務局，如果再以傳統文字方式宣傳佢哋呢個新計劃，年輕人真係睬你都有味啦！
為咗不負梁振英所託，又食吓創意風潮，民政局特別搞搞新意思，噚日推出咗幾款以卡通圖像為主嘅海報，旨在宣傳佢哋喺今次施政報告下負責嘅範疇。
好似hardsell青年發展基金嘅海報上，字眼係其次，佢哋最想用中間嘅「放水」大水喉吸睛，令人一睇即明。
民政事務局政治助理徐英偉話，啲海報係佢哋局中人自己度橋兼設計，希望新宣傳模式，可以打動吓後佔領嘅新世代。所有海報放咗喺佢哋facebook任人欣賞。