南車（1766）、北車（6199）噚日一齊發公告，話公司高層喺重組停牌前，互相買入對方公司股票唔係內幕交易，而係價值投資判斷，買入股票嘅員工當時對重組都不知情。呢個簡直係天大笑話，南北車合併，咁大單新聞傳媒一早有報道，啲高層又不斷上京開會，竟然可以話唔知情？
呢班偷步買股票嘅高層包括：北車董事長崔殿國、資本運營部部長鄢德佳、總裁奚國華的配偶、副總裁魏岩的配偶、董事會秘書謝紀龍、南車企業文化部部長曹鋼材以及總裁辦公室副主任劉國岩的配偶，總共30位高管及家屬。佢哋買股票大多數喺舊年下半年，當時中鐵建（1186）墨西哥高鐵項目告吹，成個鐵路板塊股價低迷，如果唔係知道要合併，所謂嘅價值投資判斷不知從何而來？
最搞笑係，所有買股票嘅北車高層，全部買晒南車。合併方案係北車併入南車，然後除牌，擺明南車有着數，咁買法即係話，佢哋已經知晒成單交易詳情，不打自招。
其實呢班國企高層偷步買股票金額唔多，每人都只係幾萬股，南北車A股復牌後大升超過70%，獲利最多不過幾十萬人仔。但班人連咁小數目都貪，又唔識得稍微掩飾，吃相難看，真係好肉酸。
李可強