巫斯義呢兩個賽日度日如年，上星期六先係因為策沈廐「彩球」末段垂手被罰停賽三個日，呢日(14日)上晝又研訊早前賢廐「精彩鬥士」一案，結果裁定未盡全力策騎，畀小組重罰停賽15個賽日。
堂堂一代法國名將收入事小、面子事大，呢晚谷戰一開局，阿巫即刻輸隻熱門「電子福音」，畀人以為佢心情欠佳，罰到冇晒心機跑馬。原來唔係呢回事，第二場四班千二米，佢接手蘇偉賢隻進步馬「鴻圖戰士」，有1檔揸手機不可失，起步應聲彈出，沿途守靚位，3.4倍次熱門，就咁直路彈甩馬群取勝，賽後終於見巫斯義有番笑容！
五歲澳洲自購馬「鴻圖戰士」苦戰兩季，連埋今場共15仗，卒之打開來港後勝門，幫埋阿巫贏番場，開解吓佢由本月28日開始停賽共18個賽日之惡劣心情。同場二至四鬥埋一齊，影相之後「回鄉更好」、「帶寶來」分別跑第二同第三，相反大熱門「心花怒放」卻跑梗頸四，後駒上星期三後備補出，用蔡明紹都有P，今鋪換杜滿萊反而名次仲差咗，唔知同後者停賽多時手硬腳硬有冇關呢？
「鴻圖戰士」馬主鴻圖團體成員，包括許晉亨的堂兄許晉義，蘇偉賢指出此馬過往試閘經常有頭威冇尾陣，因此特別卜定巫斯義執韁，相信這位法國騎師的韁繩適合此馬。練者又指「鴻圖戰士」來港初期還算不錯，但陣上跑落表現卻平平，但他對馬主肯定說，此馬谷草一定好過沙田，希望給予馬兒時間，結果牠近仗表現漸上正軌，跑1200及1400米均合。