亞視跨年拖欠員工薪金問題仲係膠着，前途岌岌可危，繼王祖藍等本月三十及三十一日喺灣仔會展搞嘅《HEA爆香港演唱會》倒戈喺亞視落劈價廣告，馮仁昭聽聞蕭定一近日都接洽亞視傾買經典劇版權。
祖藍歌詞寸爆王征
蕭定一老竇蕭若元喺七、八十年代幫麗的創作咗《鱷魚淚》、《浮生六劫》、《天蠶變》同《大地恩情》等二十六套經典電視劇，蕭定一為咗拯救亞視，有意用約一千萬買斷呢批劇集版權，蕭定一噚日喺電話中話：「我哋想買斷版權，同亞視接觸咗，佢哋只想賣製作video版權，大家仲要傾。」亞視執董葉家寶連日嚟都積極安排出糧，佢前晚喺blog留言，希望本月內可以發放十二月份薪金同埋如期發放一月份薪金。家寶同時提到擬把商人送來嘅一噸燕窩變賣救亞視。佢又表示決定本月二十三日舉行直播騷《萬眾同心撐亞視》吸收視，並呼籲各方好友支持。
另外，王祖藍改咗首《我和公司有個誤會》歌詞寸爆王征：「王征，無本性，全公司員工也無奈聽命，同起舞，扮高興，唔知道份薪水就快停。」
撰文：馮仁昭
