隔牆有耳:手機黨橫行 唔怕悶親人 - 李八方

隔牆有耳:
手機黨橫行 唔怕悶親人 - 李八方

【篤芒區】
由於政府喺施政報告公佈前,幾乎放風公佈晒所有「新政」,搞到噚日坐喺議事廳嘅官員同議員,聽到梁振英宣讀大部份「舊聞」時都覺悶,唔想睡相俾傳媒影到,玩手機就係抵悶嘅另一妙計,難怪噚日手機黨力壓各黨成立法會最大黨。下個月就要發表財政預算案嘅財政司司長曾俊華,攞住部手機偷偷喺枱底係咁look,見佢低頭睇得好入迷,八方都好想知佢睇緊乜鬼?民建聯蔣麗芸就攞住手機左度右度,原來係用嚟拍低噚日議會實況,仲一馬當先好快咁放晒上網。

而石禮謙、謝偉俊、田北俊、鍾國斌同張宇人,仲同一時篤手機,其中廿蚊張一度睇BB相睇得好入神,佢話係佢嘅心肝椗寶貝孫嚟㗎,由於啱啱有新相火速送到,乖孫最新玉照喎,梗係睇遲幾秒都唔得啦!

【現場直播】

【睇乖孫相】