金球獎頒獎禮（Golden Globe Awards）剛剛落幕，另一國際影壇盛事奧斯卡電影頒獎禮（Academy Awards）就下月22日舉行，一向同奧斯卡唱反調嘅金草莓頒獎禮（Razzie Awards），今年繼續挑選年度爛片。
睇番噚日正式公佈嘅提名名單，由米高比爾（Michael Bay）執導嘅大製作《變形金剛：殲滅世紀》（Transformers：Age of Extinction），喺9個組別中硬啃7項提名，同時入圍最差電影、最差導演、最差劇本、最差男配角、最差女配角、最差銀幕組合、最差續集電影，唔知到時又要吞幾多粒金草莓。
其實《變形金剛4》話晒喺香港取景，拍攝時又鬧出收陀地嘅國際笑話，仲深受強國影迷支持，今次淪為金草莓最多提名作品認真陰公，相反玩盡刺殺北韓領袖金正恩嘅《The Interview》，竟然一項提名都冇份。
至於黑色喜劇《奪命西》（A Million Ways to Die in the West）都唔弱，有4項提名。
撰文：李村姑