施政報告一如預期，悶到七彩，房屋政策繼續遠水救不了近火；反而港府突然宣佈暫停投資移民計劃，這舉動較為吸引財金界的眼球。
現時唔少中、港兩地有network的私人銀行，或專湊PI客（professional investor，入場門檻8球）的券商，都有幫內地客搞投資移民，這需求近兩年來仍在高速增長。有從事相關業務的朋友話，呢類生意其實「好睇唔好食」，事關這批客長期要有足夠一千萬元以上資產在其組合內，每次買賣要向入境處申報，手續繁複費時，完成交易時間又有限制，導致這類客仔傾向買入一些價格極少波動的資產，擺喺到好少trade。
因此，投資移民客仔少買股票，反而多買價格穩定，但息口甚低的香港債券，如香港主權債、機管局、中電（002）等債券。據講，昨日突然多咗客戶出售港企債，相信是擔心這類債券日後需求減少，故沽定貨先。
點解突然要取消呢項計劃？政府解釋，吸引外來資金「不應再是重點」，要「聚焦吸引人才」。作為開放型經濟的香港，竟然話吸引資金唔係重點，即係嫌錢多？咁係咪同發展財富管理中心的政策有偏離？自2010年把房地產剔出投資移民的准許資產類別後，樓市狂潮已唔太關投資移民事，港府實在沒理由咁做。今次係咪有人要聽order？觀乎阿爺近日打擊澳門賭業不遺餘力，海迪唔知今次係咪又關打貪事，但種種迹象顯示：阿爺好唔想畀錢流走。
海迪