金利豐（1031）老闆娘朱李月華（朱太）喺財經界出名係長袖善舞，除咗因為朋友有需要時，佢可能幫到手之外，佢平日亦十分識做，好似噚日金利豐包銷嘅新股日成控股（3708）首日掛牌，雖然呢隻新股嘅集資金額唔夠兩億元，算係細size嘅刁，但係朱太依然畀足面，一早就帶埋阿仔朱俊浩去恭喜主人家，認真唔話得。
日成係本港老牌嘅樓宇維修保養服務供應商，大股東廖澍基都已經78歲，只任公司非執董，公司交咗畀38歲阿仔廖永燊打理，由佢擔任公司主席。不過公司經營幾十年終於可以上市，股東簡文浩仲好高興，睇佢敲銅鑼開市嘅興奮表情就知道佢內心幾咁滾動！
講番朱太，朱俊浩之前求婚成功，聽佢講，仲係擇緊好日子，總之希望今年內畀阿媽飲新抱茶喇。