【休息區】
如果立法會喺特首宣讀施政報告之日專闢特別休息區，八方估計，使用率一定爆燈。咪以為八方及同事想吞卜蛇王，查實都係為官員同議員嘅健康同精神着想咋，事關八方噚日見證住，官員議員逐一被加長版施政報告擊倒。
先講勞工及福利局局長張建宗吖。平日佢為工人問題博到盡，韌力十足㗎，但面對施政報告嘅催眠符，佢都頂唔順，不時除低眼鏡捽眼，抖擻一下自己嘅精神，嗰副攰look，令佢唔似平時咁眼仔睩睩。身為特首辦主任，邱騰華可能知道晒報告嘅內容，要佢坐定定聽足兩個幾鐘，其實都幾陰功，所以當佢擘大個口放蚊得個窿，八方只希望佢放工後可以去鬆一鬆。一班建制派男議員林健鋒、葉國謙、黃定光以及Tree根，就各自用各自嘅表情，反映呢份報告嘅「吸引度」。
