財困下嘅亞視，何不轉型做娛樂台爭吓收視？噚日有單新聞，就令亞視新聞部再度「一炮而紅」，事關當梁振英喺立法會宣讀施政報告中有關教育問題，畫面出現嘅字幕寫住「鼓勵幼稚園提供全日性服務」。唔少家長只睇字幕，肯定驚訝乜梁班字咁「開放」。
但查實聽番梁振英所講，佢其實係話「委員會亦會研究如何鼓勵幼稚園提供更多全日性的服務」，唔知亞視估唔估到，「飛的」後有乜效果？八方只知唔少人睇完都哈哈大笑，仲張家輝上身咁高呼：「X你個街，亞視嚟嘅喂！」填詞人梁栢堅喺fb留言：「亞視唔出糧，員工開始玩嘢。」亞視高層葉家寶都睇到呢個網上笑話，噚日喺blog為「全日性服務」解話，佢話有人將相關標題講到係員工未獲如期發薪而故意犯錯，呼籲各位唔好「妄自猜度」，強調「今天留在亞視的同事，絕對是盡忠職守地工作」。