先有王大雷囡囡出世沖喜，後有幸運球僮坐喺場邊支持，加埋現場唔少中國球迷打氣之下，國足威到盡，喺周三亞洲盃反勝烏茲別克2:1，小組兩戰全勝提早出線8強之餘，仲成為今屆第一支鎖定首名嘅球隊！
王大雷賽前得B囡
周三朝早，國足門將王大雷喺微博度宣佈囡囡出世，「女兒，在你出生的這天，正是爸爸的比賽日！希望你能給爸爸和中國隊帶來好運！辛苦了老婆，我愛你！」仲有上場「指點」大雷撲12碼嘅澳洲球僮Stephen，佢今場着住大雷送嘅簽名波衫觀戰，繼續旺住國足。
不過，國足先要還番上場借咗嗰啲運氣先。烏茲別克嘅阿美度夫23分鐘射波省中人，改變方向下搞到大雷失位就擒，國足半場落後0:1。雖然烏茲別克賽前係咁落飛，但我求大俠有位朋友話，呢隊波喺外圍賽主場贏唔到香港，點贏中國呀！唔係馬後炮，又俾佢講中。55分鐘，國足長傳放入禁區，烏軍門將尼斯達洛夫出迎派膠，掂唔到個波，郜林喺近底線傳中，吳曦後上射入追平。
孫可入替106秒即除「烏」
之後唔可以唔讚國足教頭佩連嘅神級換人，佢喺66分鐘用踢翼鋒嘅孫可入替郜林；就喺佢入場後106秒，孫可好似美斯上身咁扭去禁區頂，之後右腳熨入死角，幫球隊反勝2:1，開出「半全場」入面最冷、成40倍嘅「客/主」。
賽前被睇低嘅國足喺B組兩戰全勝提早出線（見附表），仲靠較佳對賽成績，成為今屆第一支鎖定小組首名嘅球隊，亦係27年嚟首次喺亞洲盃開局兩連勝，兼11年嚟首次攞到小組首名。賽後內地網民一片讚好，大叫睇得爽，一吐烏氣，有啲仲吹到國足係「亞洲西班牙」喎。
同組另一場亦上演反勝戲碼，沙地阿拉伯落後1球下連入4球，反勝北韓4:1。北韓兩連敗提早出局，輸得咁樣衰，我求大俠擔心班球員返歸後，會唔會有麻煩㗎？
識睇，一定係睇足英台【英波Live】：
http://soccer.appledaily.com
http://bit.ly/engballlive