特首梁振英喺後佔領時代發表嘅首份施政報告，各界都好關注，身為特區「第一夫人」嘅梁唐青儀，噚日就以一身桃紅look，帶埋細女頌昕去立法會捧場。雖然份報告對唔少官員同議員嚟講悶到喊，但對梁太嚟講，卻似乎係「驚世巨著」，邊聽邊露出豐富嘅表情，在席見證住嘅記者都笑笑口話好有喜感。
雖然齊昕冇到，但有頌昕陪同出席立法會嘅梁太，依然好搶鏡，同行會成員一齊坐喺觀眾席嘅佢，成為傳媒鏡頭焦點。唔知梁太係咪都知道攝影記者要有貨交？
兩個幾鐘未停過
兩個幾鐘頭嘅會上，全程表情多多，托腮、仰天、遮面以至瞇埋眼唔知祈禱定肉緊嘅表情都有，更曾豎起手指公，影到攝記不亦樂乎。相反頌昕就好專注兼淡定，更一度望向身邊嘅媽媽，睇吓佢為乜用手掩面「冇眼睇」？
到咗小休時間，梁太同頌昕齊齊去廁所，其間俾記者追問老公俾議員鬧有冇心痛，佢只係笑而不語。查實入立法會嘅時候，社民連黃浩銘都有上前狙擊：「梁太，你係枕邊人呀！叫你老公做全民退休保障！」但梁太全程木無表情，喺立法會保安護送下快步進入大樓。
李八方
mailto:[email protected]