周二英足盃第3圈重賽，韋斯咸返主場再鬥愛華頓，戰情都幾峯迴路轉。韋斯咸先開紀錄後冇耐再踢多件，點知比賽末段被逼和1:1；到加時仲要先失守，好彩靠卡頓高爾喺加時下半場扳平2:2，再喺射足10輪嘅馬拉松式12碼，靠門將阿祖安卡斯迪路「埋齋」贏9:8，晉級後會作客英甲布里斯托城。同場仲加映「槌仔」球員內訌鬧交，戰情認真豐富。
安拿華倫西亞喺51分鐘為主隊先開紀錄，5分鐘後愛華頓仲有艾登麥基迪領紅被逐，點估到槌仔最後要咁辛苦先晉到級吖！盧卡古喺加時7分鐘入波令愛華頓反超前，搞到韋斯咸嘅麥克盧保（小圖左）好嬲，鬧隊友中堅湯堅斯（小圖右）防守不力，兩個人激烈拗起上嚟，要隊友勸開。領隊艾拿迪斯賽後就淡化事件，話佢兩個其實好老友，爭執吓好小事。老實講，我求大俠就話艾拿迪斯更需要關心吓韋斯咸近排狀態麻麻，計埋今場已經連續6場唔能夠喺法定時間內贏波喇。
識睇，一定係睇足英台【英波Live】：
http://soccer.appledaily.com
http://bit.ly/engballlive