舊年騰訊（700）同阿里巴巴玩「雙馬」大鬥法，馬化騰突然喺農曆新年玩突襲，推出叫「微信紅包」嘅電子利是，連大行都話高招，棋差一着嘅馬雲唔知會唔會趁羊年嚟個反擊呢？不過兩位馬生要留意嘞，呢招原來對物質主義嘅香港人係唔work㗎！
新世界發展（017）旗下、由第三代接班人鄭志剛打骰嘅K11，上月底成功訪問七百六十八人，當中七成係香港人，六成已婚，做咗一個關於利是封嘅調查。
雖然微信在港已經開始盛行，但結果顯示，七成人唔會考慮用電子方式派利是之餘，接受呢個方式收利是嘅香港人亦只得15.5%。
調查仲有個得意結果，就係原來有四成人係真心相信利是封大細，同利是金額係有關係㗎，即係利是封大啲，個饀會多啲，大家不妨下個月留意吓！