こんにちは（你好），「2015年燑開花予想」公佈咗喇。日本氣象株式會社噚日最新公佈今年日本櫻前線報情，由於預料1月氣溫比正常暖少少，所以估計櫻花會早少少開花。
#北海道最遲
日本氣象株式會社每年都會預告櫻前線，即係日本不同地區櫻花嘅開花期，噚日就公佈2015年第一回預告。櫻前線預告繼續由較南地區開始，高知3月19開花，而福岡3月21日就會開花，開到3月30日就「滿開」（盛放）。
至於港人留下最多腳毛嘅東京，緊接喺3月23日開花，開到3月31日就最燦爛。至於周圍都係賞櫻名所嘅京都，預料3月25日會開花，開到4月3日盛放。至於大阪就3月26日先開花，但4月2日已經滿開。櫻前線一路向北，最後開花係北海道室蘭，5月5日先開花，5月10日盛放。
睇番以往紀錄，東京一般要3月26日先開花，而京都就要3月28日先開，今年開花期都早咗少少。今年復活節假期係4月3日至7日，如果想趁機去東京及京都賞櫻，就要有心理預備，因為櫻花開花期只有7至10日，開到最燦爛之際，好快開到荼蘼。
不過話說回頭，近年天氣反覆，開花期預測與實際常有出入，所以當局都會繼續公佈櫻前線，下次就係1月29日。 http://s.n-kishou.co.jp/w/sp/sakura/sakura_kaika_top.html
費清 ＃要生計，也要生活 ＃毋忘初衷