後佔領時代到底要搞啲乜，先可以平息後生仔嘅不滿？呢個問題梗係特首梁振英重中之重，唔知梁振英喺今日發表嘅施政報告會有乜針對性措施，但花生友同教育界中人講起年輕人嘅問題，個個都搖頭嘆息，仲話其實老師比起學生可能更加難搞，唔少校長都好頭痕喎！
查實呢，學生有理想之餘帶點反叛，大家都接受係年輕人嘅激情，而佢哋嘅取態，好多時都係受學校影響，所以教師點樣教就好受外界關注。最近政圈咪傳出，建制派想扭轉教育界由民主派嘅教協主導嘅傳統，希望壯大吓左派教育界組織，例如教聯等等，據知都係中央諗法，無非想啲教師「受控」，同前港澳辦副主任陳佐洱話香港教育制度種出「毒豆」喻港青理念一致，其實都係想鬧啲教師之嘛。
校長嫌年輕教師「有偏差」
有教育局中人同花生友吹水，話社會成日話學生難搞，其實教師難搞程度一樣唔可以睇小。佢引述唔少校長愁眉苦臉訴苦，話𠵱家好多年輕教師嘅想法同學生無異，學生嘅行動係自己嘅選擇，冇乜所謂，但教師卻影響緊學生，有時如果教學方式有啲偏差，真係要出聲。
但喺呢個白色恐怖時代，據聞有啲校長都係敢怒不敢言，以免開口話呢啲教師，又會俾佢哋話係政治打壓，有時只能好有技巧咁表達意見，費事惹起另一場風波，苦笑反問政府有冇方法可以幫佢哋減減壓？
花生友