為咗搶海洋公園免費飛，你會去到幾盡？有人就懷疑因為咁而「不誠實取用電腦」，仲「竄改歷史」㖭。
事緣，海洋公園1月6日公佈為慶祝開業38年，送1萬張門票，凡持本港身份證居民只要喺本月10至16日喺海洋公園facebook答啱一條問題就可以抽獎，贏取一張入場票。
#開幕年多次被改
問題係「海洋公園於甚麼年份成立？」好多人會上網搵答案，維基百科最易搵到。如果你信，咁就瀨嘢。
維基一直都係寫正確資料，話海洋公園於「1977年1月10日開幕」，但費清發現，1月10日起一直不斷有人修訂資料，錯誤改為其他成立年份，之後被更正後，又有其他人再改錯，如是者，呢場網絡戰打到噚日已經修訂咗40幾次！
會唔會係咁啱咋？你估拍緊大婆台啲老電視劇咩？邊有咁巧合！只要睇番網友刻意錯誤修改嘅年份，就知係專登，因為錯誤年份包括1975、1980及1982，正正就係公園選擇題提供的錯誤答案，仲唔係想裝彈弓?
海洋公園回應，至噚日已錄得近80萬人參加抽獎。海洋公園雖然會不定期檢視並更新非官方資訊渠道如維基嘅資料，但由於維基容許任何人士編輯內容，所以唔能夠保證資料準確。海洋公園建議最好參閱官方資訊渠道如官方網站 ( http://www.oceanpark.com.hk )等。
不過咁，其實2015年減38年，咪係1977囉。（點解唔撳計數機?）
費清
＃要生計，也要生活 ＃毋忘初衷