俗語有云「坦白從寬」，九龍東立法會議員謝偉俊阿Paul就係一個好例子。佢早前同其他建制派提出想加入番立法會財委會嘅工務小組，喺咁多個申請逾期加入嘅建制派中，得佢一個肯積極配合由泛民主導嘅小組要求，上次親自出席特別會議，解釋想申請逾期加入嘅原因。所以噚日即使因公務身在濟南，缺席工務小組討論佢可唔可以遲咗報名都入會嘅申請時，泛民一樣放行，一致通過畀佢加入。至於其他建制議員擺明想速戰速決，等小組否決佢哋嘅申請後，再繞道經財委會加入工務小組。八方噚日問過身在濟南出席一個古木雕塑展覽嘅阿Paul，佢話好多謝小組接受佢成為委員，話自己能夠過關，無非因為夠坦白，認晒衰話明係遲咗加入，相信因為善意解釋，所以獲泛民正面回應。