陳潔儀（Kit）喺湖南衞視《我是歌手3》第2集被叮出局，好多網友認為Kit冇飆高音，唔符合國情被foul。不過自稱有份畀分嘅觀眾，喺網上話Kit比賽時走音。噚日湖南衞視芒果台喺微博貼Kit嘅視頻講落敗感受：「我不是一個競技性的歌手，可能我挑的歌不是很競技性，只能把最好的自己呈現給觀眾，我覺得可能會不會是喜歡聽我歌的朋友不來節目，我的歌比較內斂。」
雷頌德撐冇問題
Kit嘅經理人用WhatsApp回覆本報：「潔儀在海外有好多大型成功演出，而內地現場演唱不多，難免會混淆沒聽過她現場的朋友，來對她產生質疑。」雷頌德噚日亦力撐Kit：「我聽過佢唱現場冇問題，佢都係高能力歌手。」
此外，《歌手3》第3集將於後日喺湖南衞視播出，據知Kit以表演身份唱《Nothing compares to you》，古巨基唱Beyond嘅《情人》首奪第1，上集排名首位嘅張靚穎今次就包尾排第7。
撰文：馮仁昭
