13屆冠軍騎師韋達，今期替吳廐效力兩駒，包括第二場「帶寶來」及第四場「飛翔星」。
先講「飛翔星」，今季演出非常好，四戰攞到冠亞季殿各一，上次韋達初騎，排11檔劣勢下只輸半身位給「多多心得」跑第二，可見人馬非常合拍，今次再騎可以話順理成章。
反而「帶寶來」過去喺呂廐四戰，表現平平從未上名，今次乃久休近八個月轉倉初出，好多人都唔明點解韋達肯騎呢匹馬，呢個謎就等我們為大家解開啦！
睇番「帶寶來」馬主晉安團體過去有匹「帶喜來」，唯一上名正係由韋達策騎，而晉安團體主要成員王聰德，以往隻「帶旺來」曾由韋達勝出，另一成員洪省治嘅「帶運來」韋達亦建過功，根本韋達就係呢班人嘅主力殺手。
再講番「帶寶來」，雖然初跑谷草，但去年三月由呂健威訓練時，其實已贏過谷閘，轉倉後上月再試谷閘，亦都跑第二走勢唔錯，反映場地性能甚佳；何況吳定強同韋達今季谷草合作三次得一冠一亞，種種原因加埋，大家就會明白韋達點解肯騎「帶寶來」！