「債王」格羅斯舊年離開由佢一手創辦嘅PIMCO，跳槽去駿利資產，可謂轟動財金界。當時已經有傳聞話債王份人太神化，同其他同事唔夾，係俾人逼宮先劈炮，甚至話佢係被炒魷，但一直冇任何人證實。債王最近接受《彭博》訪問時終於自爆，承認佢離開PIMCO係被炒，認真陰功豬。
格羅斯話，佢發覺自己同PIMCO管理層無論喺個性還是業務發展目標都有分歧，佢最初提議自己退出公司行政委員會同薪酬委員會，轉去負責封閉式基金，諗住自己燉自己冬菇會保得住個位，點知換嚟慘烈下場。
臨炒前1年，格羅斯最少三次向公司建議自行淡出部份職責，可惜最終俾人暗算，佢都冇諗過公司一個行政委員會，可以開除公司嘅創辦人。