隔牆有耳:65%青年唔肯北上搵食  - 李八方

隔牆有耳:
65%青年唔肯北上搵食  - 李八方

特首梁振英鼓勵年輕人放眼香港以外嘅地方,北上發展,不過年輕人未必咁諗,智經研究中心一項「香港青年往內地就業態度」調查發現,65%受訪青年就唔願意北上打工。
過半數唔想北上打工嘅青年人住慣香港,認為北上文化生活相差好遠,有啲嘢唔係話融合就融合到嘅,去到又要擔心食物安全,分分鐘食咗地溝油都唔知,三成人就話對內地政治同法治環境冇信心。
不過都有33%人願意北上,智經研究中心理事及研究召集人李金鴻話,中國有13億人口,咁大個市場,大把錢搵,真正錢途無限。
李金鴻話呢個調查嘅對象係未北上打過工嘅年輕人,佢哋唔願意北上係因為唔了解內地同內地法制,認為只要多啲認識,譬如辦多啲北上實習機會,令後生仔多了解內地法規就會冇咁恐懼喎。