特首梁振英話有人用滙豐銀行同一分行本票捐錢，就睇到外國勢力嘅「端倪」，咁「超人」李嘉誠幾十年來同滙豐一直保持良好關係，上星期公佈長實（001）與和黃（013）世紀重組合併嘅大刁，滙豐又係主要財務顧問，唔通當中有乜「端倪」？
大家都知道超人自從1979年向滙豐買入和記黃埔逾兩成股權後，一直保持友好關係，「小超人」李澤鉅𠵱家都係滙豐董事。
英國《金融時報》噚日都提到，滙豐喺香港嘅零售同商業銀行業務做得好好，但係投資銀行就麻麻哋，今次攞到超人呢單世紀重組大刁，即刻省靚晒自己個招牌。
咁又係呀，滙豐淨係借450億元畀長地（長實、和黃合併後嘅長和分拆出來 ）向長實、和黃收購地產資產，從中收到嘅利息應該都幾可觀。咁究竟超人跟滙豐老友，同佢伺機遷冊又有冇「端倪」呢？