361度（1361）唔單只有炒盈喜，今年定單增幅keep住靚仔。業績翻身下，股價仲潛喺五年大底，係時候等大彈升。
361度已經發佈，即將派發上年度（12月結）成績單中盈利會大幅增長。數唔駛計多，單計2013年度1.5億元人仔減值，一個來回，361度盈利已經可以增長70%到3.61億元人仔，PE即由16.3倍，跌到得9.5倍，平絕場內。
贖回CB 財政狀況佳
好嘢仲未講完，361度喺盈喜報告提到，運動服裝行業消費意欲逐步提升，令經營收入同溢利率都上升。呢個point，對呢間運動零售企業就好緊要。
集團啱啱公佈咗冇耐，今年秋季訂貨會定單增加咗16%，兼係繼春夏訂貨會增加11%之後，進一步錄到增幅。祖國運動零售復蘇係361度嘅強心針。而且阿爺同民間加快推動體育產業，據國務院預計，10年後祖國體育產業總規模將會超過5萬億元人仔。體育產業谷起，361度都長搵長有。
361度繼上年10月購回總值8,624萬美元CB（折約6.7億港元）後，再喺11月提早贖回CB餘額1,140萬美金（折約8,890萬港元）。
CB贖回，證明361度財政狀況極好，佐證集團對嚟緊日子嘅收入表現，充滿信心。慳番唔少CB利息支出，可以喺今年度反映。
唔好計多，當361度2014年多賺20%咁大把，去到4.3億元人仔，PE得8倍。361度現價（2.1元）比2010年8蚊高位，大跌74%，PB得0.75倍。場內大見紅李寧（2331）PB 1.2倍、安踏（2020）3.7倍，361度亦係平咗截。
買361度，當翻半番大約到3.17元計，今年預測PE得12倍，PB 1.1倍，都仲未追到李寧。
錢雋
細價股專家
本欄逢周二、三、五刊出