呢幾年地方政府狂借錢，風險逐漸失控，亦成為內地經濟最大隱憂之一。
中央曾多次公佈地方債數目，話風險可控，不過外界通常都唔會信。上有政策，下有對策，係古今官場通例，地方政府會講真話先至出奇。
國務院要求，1月5日前，各個地方政府要再報一次，到底有幾多債喺身。期限已經過咗，內地傳媒報道，而家各方仲喺度傾緊數。
有些市政府已經報咗條數上去，但一再被省政府打回頭，要再報過，然後再打回頭，再報過，如是者反復。有啲市來回報咗五次，省政府都唔收貨。
例如江蘇省有一個市，上面畀嘅quota係，去年6月底審計數字乘以GDP增長率，不能超過此數。
該市官員話，最後省政府同意上報中央嘅數目，不到真實數字嘅三分之一。
由今年起，地方債被列入政績考核，所以省政府啲官員想千方百計冚咗條數。
但市政府又想報多啲數，因為報咗上去，第日先有機會搵中央找數。所以大家拆來拆去，至於最後統計出來條數有幾真，恐怕官場上冇人會理，整個統計只係得啖笑。
李可強