大律師公會主席石永泰資深大律師喺周一嘅法律年開幕禮致辭時爆seed，踢爆有啲政府官員開口埋口講依法乜乜、依法物物，其實就想啲人盲目咁守法，方便政府極權管治。石狀個主席位坐多兩日就要交棒，八方收到風，唔知係唔係冇乜人肯坐呢個三煞位，所以得一張名單參選，相信今個星期四，新任正副主席就會產生。
今年邊個肯捱義氣？據聞早兩年做過副主席嘅譚允芝資深大律師會做主席，而副主席則係林定國同謝華淵兩位資深大律師。譚狀除咗係知識產權嘅法律專家外，仲酷愛音樂，中學已代表香港到英國巡迴演唱，入讀港大法律系後，更為升格後嘅法律學院創作Law Anthem。雖然主席之位由火爆「高登佬」交到「能歌善琴」嘅女大狀手上，但見他倆8.31人大落閘後一齊見京官，明確指出人大決定有不合理限制，譚狀硬淨程度當唔會差過石永泰。