現為觀塘區議會主席嘅陳振彬，做多一陣青年事務委員會主席，4月就會卸任。政府唔係因為覺得由56歲嘅佢掌青年事務好諷刺所以叮佢走，亦唔係因為佢話大學生申請公屋係放棄自己嘅言論而換角，事實係因為陳振彬做埋今年都夠六年，喺政府委任諮詢委員會成員嘅「六六原則」下，真係要走咯。
36歲「太幼嫩」
咁邊個係青年事務委員會主席接棒人選？政界早前熱傳現為青委會成員嘅霍啟剛係大熱，但八方向政府相關知情人士了解過，覺得今年踏入36歲嘅霍啟剛，雖然有熱誠，但都係太幼嫩，可能要再磨多一陣先升呢。但估唔到呢個消息，卻令霍啟剛躺着也中箭。
有政府中人同八方講，自從霍啟剛接任青年事務委員會主席消息傳出後，唔知點解好多人都同政府講，話搵霍啟剛唔掂㗎，佢係富二代好離地㗎，未必適合啦等等，個個都叫政府唔好搵佢，係咪唔抵得霍啟剛少年得志？八方當然唔知，只知有關言論反而令有啲政府官員都為霍啟剛抱不平，覺得佢都算係盡責嘅委員，咁樣中箭好可憐；有人就質疑，莫非係另有青委會委員想做，因此猛放暗箭？