和黃（013）大班霍建寧最近忙住為重組解畫之外，亦有單開心事，佢同太太持有嘅赤柱舂磡角道66號大屋，靜悄悄搵到新租客，新租客以月租27萬元承租。新租客以公司名義租，董事包括美國賭業公司凱撒娛樂主席Loveman Gary William。
霍大班呢間屋實用面積超過3,900平方呎，呎租約69蚊。間屋有私家泳池，仲可以望到舂坎角海景，四圍環境算係唔錯。
港交所（388）行政總裁李小加係前租客，喺2011年以月租近29萬元租住兩年。
後來市場傳出霍建寧喺市場叫租30萬元，但係冇乜反應，舊年6月曾經有消息話，霍建寧將租金降至每月25萬元，家陣終於以27萬元租出，雖然平過李小加嗰份租約，但係好過丟吉納空租啦。