【永別司馬燕之摯友話別】抗癌勇士司馬燕大前年發現胃癌，去年病情反覆，上周末（10日）在睡夢中安詳離世，終年51歲，她的家人昨日向傳媒證實死訊，司馬燕生前人緣甚好，最愛搞派對娛賓，友人都難忘參加過她搞的派對。
鍾慧冰女被灌醉
洪羅拔在司馬燕患病期間一直有探望支持，他表示最後一次見面是一周前，他昨在電話中說：「佢當時都唔行得，我猛叫佢加油，呢幾日我一直聯絡唔到佢老公，好想知乜嘢情況。阿燕病後唔想朋友擔心，佢好樂觀面對。佢係我朋友中嘅一百分best friend，一流冇得頂，對朋友好有義氣。」
吳麗珠昨表示見過病床上的司馬燕呻痛不欲生，她說：「有次佢同我講，佢痛不欲生，嗰次係幾個月前嘅事，嗰次探佢，佢係痛到唔想講嘢，嗰次係唯一一次。」吳麗珠揚言會送好友最後一程：「我會為佢誦經，希望佢往生好走，如果佢哋真係去溫哥華，我就一定到。」
鍾慧冰昨也在電話中說：「聽到佢死訊好傷感，阿燕尾期都好辛苦，不過生死有命。」鍾慧冰難忘參加司馬燕搞的派對：「佢係『party精』，次次都有唔同主題，難忘一次係當年我囡囡得七歲，農曆新年去阿燕屋企，佢例牌入屋前要飲一杯，遲到罰三杯，嗰年佢改為叫我哋食七彩啫喱糖，原來糖中落足料加咗酒，結果班細路拎咗一盤入房一邊玩一邊食，我入到去先見囡囡瞓咗喺地。阿燕凝聚力好強，佢只希望朋友開心，佢照顧得老公同一對仔好妥貼。」
謝天華讚夠積極
謝天華在電話回應說：「佢知道自己有呢個病之後，好積極面對冇逃避，佢接受咗好多治療。」有指親人會為司馬燕舉行追思會，天華說：「我暫時未收到有追思會呢個消息，生老病死冇一個可以逃避，我覺得佢唔想睇到我哋太傷心，反而輕鬆啲去接受。」
採訪：魯吉、陳杰
