立法會行管會噚日除咗喺建制派要求下，加設六項辣招規管示威，八方仲聽聞，立法會主席曾鈺成同時宣佈，決定同今年8月約滿嘅立法會秘書長陳維安續約三年，意味陳維安將留任至2018年，可算係對日前生日踏入50歲嘅佢送上嘅最佳生日禮物。八方問過陳維安點睇呢份厚禮？佢話雖然家嫂唔易做，但感謝立法會各位老爺奶奶嘅愛護，「日後會繼續持家，不負所託」。
八方仲聽聞，噚日行管會睇咗立法會秘書處委託保安顧問公司做嘅「終極報告」，發現有唔少新建議，包括將現時立法會記者證嘅三年有效期縮短為一年，即係記者要年年換證，每個議辦亦只能有五張職員證等，同時又建議為立法會保安增設升級表同增薪點。由於只屬建議階段，未知最終會唔會落實。