【本報訊】長和系世紀重組震驚金融圈，豈料重磅消息浪接浪，主席李嘉誠的紅顏知己周凱旋日前在以色列接受傳媒訪問，首次開腔大談中港政治與前景，直言渴望政改獲全票通過。
稱考慮選特首 後指講笑
被記者問及未來會否參選特首，周反問記者：「你會唔會選我先？」在場傳媒稱好，續而追問她會否參選特首，周再笑着反問：「我？你哋會唔會選我先？冇人要我嘅！」記者再問，她答：「你知唔知𠵱家一講參選，可能即刻會……」雖未有把說話講清，但在場傳媒第四次提問，她答覆是「多謝你，不過回答唔到你呀，等我諗諗」。
首富紅顏有意參選報道昨下午5時出街後，李嘉誠發言人回應指「李生知道周小姐見記者，亦知道佢講笑」，發言人約40分鐘後再致電記者補充，指周澄清選特首是講笑。
李嘉誠曾在接受內地傳媒訪問時，表示後悔自己沒有從政，對此周凱旋主動重提，指李嘉誠「絕對唔可以從政」，「我從旁睇，覺得佢冇一種take it to heart，心胸太闊」，仁德對從政者理應是優點，當傳媒追問仁德何以變成掣肘，周凱旋進一步解釋，「心胸闊係對老百姓好啲……但嗰個人好好辛苦㗎嘛」。她指李嘉誠對外界批評從來不放在心上，調侃媒體「寫得佢最多，但最唔了解佢」，多次形容李嘉誠「好怪」，「佢個人好感恩，覺得自己有好大恩賜，平時演講經常用恩賜、眷顧呢啲字眼」。
董建華近月出山為政改護航，曾為董打工的周凱旋形容政改「這是a huge bet（一場豪賭）」，她希望政改通過，亦要獲立法會全票通過。她指中國近10多年已不斷進步和改變，深信有選舉平台，便會有合適人選出現。「冇（平台）嘅時候，日日開電視，嘈吵呀，講大話唔眨眼呀？你哋唔厭嘅咩？唔熄電視嘅咩？好似Deja vu（熟口熟面）咁，動作指定重做？𠵱家唔係一個人講大話唔眨眼，幾乎係人人講大話唔眨眼！」
談到雨傘運動，「啲細路仔唔信任都係好natural，呢個又咁，嗰個又咁，你叫我點嚟嘅信心！」她又揶揄公職人員心態已非服務大眾，「唔知點解要管治老百姓」，舉例指以色列政府「冇話要領導大家，要咩局咩局咁」，又寄語年輕人「千祈唔好冇希望，希望係自己做出嚟」。
■記者馮健鏗
周凱旋語錄
談撤資：「講李生撤資係絕對唔合適，如果投資機會唔係好多，我哋都要為股東考慮。」
談選特首：「回答唔到你呀，等我諗諗。」
談李嘉誠：「李生個人好奇怪，所以佢絕對唔可以從政……我從旁睇，覺得佢冇一種take it to heart……心胸闊係對老百姓好啲，但嗰個人好好辛苦㗎嘛。」
談雨傘運動：「啲細路仔唔信任都係好natural，呢個又咁，嗰個又咁，你叫我點嚟嘅信心！如果有機會，真係畀一啲真係想服務嘅出嚟，世界就會更好。」