滙豐上星期四忽然喺內部公佈滙豐香港一姐馮婉眉（Anita）唔撈，仲要下月中就拜拜，正當大家諗住Anita會潛水一排，費事被人追問離職原因，佢噚日下晝就現身亞洲金融論壇，估計係一早應承咗走唔甩。不過，Anita噚日好似有啲疲態，可能受到現場燈光影響，又或者離別在即，心情始終比較沉重啦。
Anita喺滙豐工作廿年，忽然話唔做，孖屐猜測可能因為係佢未能更上一層樓。見慣大場面嘅佢又點會咁易透露端倪呢，當有人單刀直入問佢點解走，佢先係呆一呆，瞬間回過神來，保持一貫和顏悅色，好客氣咁話「希望大家集中討論亞洲金融論壇」。
佢跟手回應傳媒有關渣打銀行最近嘅裁員問題，好行貨咁話，香港係國際金融中心，又背靠祖國，對本港金融業有信心云云，總之就係兩下太極就耍走大家，原來Anita都係太極高手！