曼聯呢排個勢頹頹地，連續3場聯賽都贏唔到，上場仲要喺主場輸埋畀修咸頓，唔少球迷都認為係領隊雲高爾嘅責任，死都要踢3-5-2。不過，雲高爾諗咩，我哋呢啲平凡人真係識條鐵咩！佢就請咗個泰拳大師去卡寧頓訓練基地，教班球員打坐，提升心理質素。
英國《太陽報》收到風，泰拳大師施簡已經受邀到卡寧頓訓練基地，同班球員上堂。朗尼等曼聯球員唔係學踢暴力足球，而係學打坐冥想，提升情緒管理嘅能力喎。施簡大師有兩句座右銘，其實都有啲老土，分別係「以柔制剛」同埋「先修身後平天下」。雲高爾似乎好信呢位大師，佢認為施簡嘅訓練可以等啲球員更加專注，提升球場上嘅表現，同埋減少傷患㖭。我求大俠心諗，佢有冇咁神呀！
藉打坐冥想改善情緒
曼聯內部人仕透露：「喺訓練入面專注情緒管理而唔係體能，呢個決定好唔尋常。不過曼聯呢季表現唔多掂，雲高爾願意嘗試任何幫到球隊嘅方法。佢相信一個球員頭腦清晰同體能好一樣咁重要。」照《太陽報》咁講，雲高爾睇呢啲精神訓練重要過體能，係咪已經亂咗陣腳，開始有啲亂石投林呢？唔知下次會唔會聽到啲小報話雲帥請蘇師傅同玲玲姐去睇吓風水呢？
法卡奧或遭棄用
雖然唔知泰拳大師啲打坐冥想有冇效，但曼聯前鋒法卡奧肯定會好勤力咁練，因為佢要爭取雲高爾嘅歡心。上場對修咸頓，法卡奧冇傷冇病但都冇入大軍名單，令人猜測曼聯好大機會唔留佢。其實，法卡奧一早都心知不妙，好清楚自己嘅表現仲未得到雲高爾滿意，所以佢早前小腿傷癒後，成日獨自加操，希望用加倍嘅努力感動雲帥。不過，有時啲嘢唔係雲高爾話事，因為由摩納哥度買斷法卡奧要成4,300萬鎊（約5億港元），真係好鬼貴。
曼聯舊年夏天已經使咗近1.5億鎊，雖然贊助多箒，但如果今季冇前4的話，下季收入肯定繼續跌，球會又點肯放水買人！英國《每日郵報》引述阿士東大學教授卡斯摩亞話，如果曼聯攞唔到下屆歐聯參賽資格，損失可能高達1.5億鎊！佢話，雖然好難量化，但估計曼聯喺聲譽上嘅損失就5,000萬鎊，影響商業吸引力。
識睇，一定係睇足英台【英波Live】：
http://soccer.appledaily.com
http://bit.ly/engballlive