香港有條奶頭村，位於老遠嘅東平洲。本來都冇乜人識得呢條村，全靠一班東平洲原居民，個幾月前叫晒傳媒一齊登島，見證佢哋鋸斷十幾棵祖先留落嚟嘅大樹，奶頭村人氣因而急升。呢班早已搬入市區、棄守家園嘅原居民，因為唔妥政府為保育東平洲制訂嘅審批發展圖，冇將奶頭村嘅祖先土地剔出郊野公園，所以做出傷害自己土地環境嘅自殘行為。原居民仲喺東平洲掛橫額，認為奶頭村被迫劃入郊野公園，冇得起樓，等同「奶嘢」。梁振英上任後不停游說社會接受保育地區起樓，佢咁福為民開，不如就順應奶頭村嘅民意，喺嗰度起公屋、居屋，叫做奶頭邨、奶頭苑囉。