政治呢家嘢，唔怕你抽水，最怕抽錯水。噚日左派報章《文匯報》獨家報道，引述「消息人士」話政府今年5月會喺啟德郵輪碼頭舉行大型音樂會，頭炮邀請台灣超人氣樂隊五月天，睇中佢哋廣受年輕人歡迎，次次開show都一票難求，希望用rock 'n' roll令年輕人笑番吓，為佔領運動修補傷痕。
五月天竟然願意來港做維穩show？八方睇過資料，發現佢哋撐過台灣太陽花學運、又曾經聲援學生佔領立法院行動，更一度傳出俾內地封殺，所以呢單獨家猛料引起好大迴響，有網民話期待當日全場舉黃傘，又有樂迷唔想五月天淪為政治工具，話情願佢哋唔嚟好過喇。
主辦機構即否認
但有網民好心水清，話五月天喺反服貿事件立場舉旗不定，話唔定會為人民幣跪低呢。五月天演唱會主辦機構特高娛樂製作有限公司宣傳經理梁先生同八方講，今年已經係五月天來港演出第10周年，諗住同某慈善團體合作籌款，強調個唱係私人演唱會，同政治冇任何關係，「完全唔關事，政府冇聯絡過我哋，如果政府搵慈善機構合作我哋都歡迎，但唔想拉上任何政治關係，演唱會令社會和諧舒緩情緒冇所謂，但唔會係政治立場出發」，換言之都唔係嚟出席維穩騷啦！
八方亦問過五月天經理人，佢話五月天往年都喺紅館開騷，今年申請唔到紅館檔期只好另覓場地：「場地問題很麻煩，想過戶外唱，正在選擇，但香港5月多雨，歌迷覺得不太適合。」並話已做最壞打算，萬一場地遲遲未確定可能停辦㖭呀！民政事務總署只回覆八方，話跟進緊五月天來港演唱一事。
李八方
mailto:[email protected]